Roland Magdane – Les rois des fous.
« Igelliden n yiderwicen »
Meɣres 2020.
Ddunit teqqel d sbiṭar n yimehbal
Taεekkazt rnan-as asḥerlelli
Ṣṣdid i hemmej deg wuzzel
Iderwicen gezzren di tlelli
Yel tamurt tesbedded aselway
D yiwen seg yigelliden n yiderwicen
Xas yezgel-iten ṛṛay
Ṭṭuṛcen tiḥerci n wuccen
Amsihri ixeṭṭeb anemlay
Igenni kkren ad t-neqqcen
Lekteb deg yimi d amlellay
Rran di ṭṭarf widen iḥercen
Akken tidderwect ur d-ttenfal
Heggan-asen-d s wacu ara leεben
Tiselbi ttaken-tt d lfal
Tamurt cudden-tt s yimraren
Lğehd yekna d uffal
Annar deg-s tturaren
Iderwicen xedmen akarnafal
Agdal yeččur d akraren
Mačči d takerrust n uxnac
Neɣ d taferfart n warsus
Mačči d ṣṣyada n leḥnac
Tisuqqas ur asen-t-yezmir ufus
Ffɣen tajmaεt n rbeεṭac
I sextutsen di ddunit ma drus
Ɛemren yigran d aḥbac
Di tikli acḥal d amuṛḍuṣ
Fkan-asen ṛṛṣaṣ d yijenwiyen
Labyuwat ttcerrigent lḥiḍ n ṣṣut
Tturaren s terwiḥin n yiεsekriwen
Sserɣayen iḥerqan d lqut
Zehren yiberdan s yikamyunen
Di tikli-nsen ttağğan-d lmut
Kessen deg widen i ten-yettamnen
Ttağwen-d idim i tefsut
Igelliden n tmura i d-yufraren
Ḥemmlen zzhu d tmeɣriwin
Yal wa inecced wa ad mnamaren
Ttεemmiṛen ṭṭwabel d tiwiztin
S lehna ucengu zehren
S tugdut qqazen-as tisrafin
Mi isuɣ deg-sen waɣzen
Lbumbat meḥḥunt tiɣeltin
Nutni ur tturaren ara s ulqaf
Taxnact d tuqqna n tuffra
Ur ẓẓaden tissirt d yiɣuraf
Neɣ timucuha ɣer tafrara
Ur ssinen ḥğelğel d umanyaf
Tajgagalt, timqeddemt d ṣṣanya
Tusna n waṛẓaẓen d aglaf
Lmut n yigellilen d lkimya
Igelliden n yiderwicen ttemnamaren
Yal wa yeskanay-d acu i yesεa
Igelliden iderwicen ttemεayaren
Yal wa yeskanay-d yeṛwa
Igelliden n yiderwicen ttemyasamen
Yal wa yebɣa ad yekk nnig wa
Twalaḍ tineḍḍabin sεiɣ
Gezzment lebḥur almi d lmeṛṣa
Muqel lmedfeε i d-rniɣ
Anda yessaweḍ tiyita
I yimussnawen, tadrimt rniɣ
Abeεεuc ad yessenger Ccinwa
Yal tameddit
Igelliden n ddunit yeddrewcen
Ur sellen ara i tmucuha n waɣzen
Imi waɣzen, d nutni i t-yesbelεen
Yal tameddit,
Mi bdan ttεeggiḍen wuccanen
Xedmen-d lbumbat ara ten-iwansen
Mi ara izehher lxiq deg wulawen
Ttmekkinen di yiεṣekriwen ɣer sdat
Nutni ddurin deffir yilwiḥen
Xas igenni yessebleε tafat
Tirṣaṣin zuzunent irwiḥen
Leεqel iseɣ yenfa-t
Yettnaḍaḥ ɣef lehna n yiderwicen
Ḥettmen i yal aεsekriw d uğundi
Di tikli ad ɣelben acengu
Deg unnar lmut tundi
Iṛwiḥen ṣemṛen-ten ɣef ujgu
Tiselbi deg wafriwen teldi
Di ṭṭraḍ tesgem tettargu
Mi neggren fukken yimenza
S ikumya i d-ssawaḍen iserdasen
D asfel yura ɣef twenza
Iẓekwan i yiɣsan ɣezzen
Gan am ifelfel n tuddza
Tlaq lmut akken ad idiren
Di tmurt yettsuɣu wanza
Tiselbi tesserεaεec igelliden
Mi εyan di ṛṛṣaṣ d yiɣsan
Ad beddlen s wacu i tt-urarren
Ad d-skeflen lεic ddaw waman
Di tfekka ad ssentun accaren
I tedrimt qqlen d aklan
Seknayen deg ubrid-is agduden
Ttkellixen igerdan s yizlan
Nutni di cfawat hudden
Ṛḍel-iyi-d le pétrole d lgaz-ik
Ad k-zzenzeɣ lbumba n neutron
Efk-iy-id l’uranium n tmurt-ik
Ad k-slemdeɣ tamussni n les espions
Llan diɣen yigelliden-nniḍen
Tidderwect d tagelda n yilefḍan
Ḥesben imdanen d iɣiden
Tamussni deg wallaɣ tuẓam
Am yilli mi kksen yifṛiden
Tacekkumt ur d-tettarra sslam
Leqrar n tmes d iɣiɣden
Iṛwiḥen d tawenza n ṭṭlam
Ur ɣṛin ur asen-tefki ṣṣifa
Ul-nsen d ṭṭerḥa n yiḍumman
Cwiṭ tesεa tmurt d lɣella
Kulci sekkfent am yizerman
Ttkellixen s leqṛan d ssuna
D twiztini i d-iteddun deg waman
Meḥḥun asirem d tusna
Aẓegḍuf ẓẓan-t deg yigenwan
Sbedden iεsekriwen i yigenwan
Rran-tt i ddin d tẓallit
Iderwicen deg yiberdan qqwan
Rran tawwurt ɣef tneflit
Cwiṭ n tedrimt yellan
Ur d-tezzi fell-as tmeddit
Le tiers-monde i as-sseman
D timuran ttelt n ddunit
Tiselbi tessegmi deg wul
Terna deg wallen leḥruz
Qqnen ɣer teεrurt-nsen awtul
Yekkaten lɣiḍa d ugerbuz
Mi d-εeddan zzuɣuren deg yijifaṛ
D anza n tugdid n lmut
Di tmussni ttarran-d ttar
Azemni zellun-t s tefrut
Tikwal yettsuɣu-d waẓar
Agdud yettnadi ɣef lqut
Mi yesbedd lqedd Wanẓar
S rrebrab sganayen tugdut
Mi d-yekker ugdud s ddemmar
S ubeεεuc ad as-ɣeḍmen ṣṣut
Igelliden n yiderwicen
Sbedden tiselbi d ddin
Aslufu-nsen d ixebbicen
Allaɣen-nsen werğin ldin
Deg wasmi qqlen d igelliden
Inyiren werğin fsin
Zehhun s yimeṭṭi n yilmeẓyen
Widen mi εegben ifassen
S lminat yundin deg wagdalen
Yeqqlen d iẓekwan i ṭṭir
Zehhun s lmut n yilmeẓyen
Widen yeṭṭfen gar yifassen
Lehwa n usigna i d-yettenɣalen
D timiqwa n nucléaire
Tikwal yettnulfuy-d ṭṭbib
Amejjay yettdawin s tεerfit
Qqaren-as « Prix Nobel de la paix »
Arraz Nobel n talwit
Ad as-εelqen cciεa ɣef wul
Tceεεel s ddheb i ireqqmen
D aseḍṣu n llufan mi d-ilul
D ticraḍ ɣef wudem i iwecmen
Ziɣ εelqen-as-tt ɣer tama n wul
Anda idammen rekkmen
Taṛṣaṣt ɣef wudem-is i tẓul
D zznad akked nnican i iḥekkmen
Ddunit tleḥḥu d timendeffirt
Neggren yimussnawen yeɣṛan
Iṭij deg yigenni ɣef tgecrirt
Deg yifwaden asirem yeṛɣan
Nnif yeẓẓel ɣer tesrirt
At tedrimt uɣalen d ideɣṛan
Igelliden n yiderwicen di ddunit
Ttextiren-d iqeddacen d waklan
Ibuεemmaren i iqeṭṭun di tsertit
Deg usirem n ugdud zlan
Yal aṭṭan xedmen-as tisegnit
Rebḥen s yixxamen xlan
Amezruy regglen-as aḍref
D ungif i as-yettṛuẓen tuyat
Tadɣaɣat, arruy d yilef
Ṭṭfen imeḍqan di lbirwat
Tutlayt deg yimi txulef
Ɣef yiles i ttelmen zzedwat
Aɣyul teqqel-as-id lḥikma
Yettrayi ɣef tdamsa d tedrimt
Ikerri fkan-s lkaẓirna
Ɣef tlelli yeqqel d tadimt
Agerfiw iεuss-d ɣef leqraya
Yekkes-as i tmussni talqimt
D wagi d udem n lḥukuma
D azrem yebran i teglimt
Di tgelda n yiderwicen
Agellid yettweṣṣi-t uwtul
Yettak-as timsirin s wurawen
Ɣef uɣerbaz yesbedd aɣyul
Deg ubrid beggsen-d i wuccanen
Axxam n ccreε yezdeɣ-it uṭermul
Ṭṭfen tisura yiqananen
At nniyya ur ssinen lmul
Fiḥel ma tnudam deg yisefra
Nniyyat mi ttlen yilsawen
D kečč, d nekk akked kra
N widen iɣilen d izmawen
Kksen-aɣ tamurt deg-s nekra
Cwiṭ n yigenni i aɣ-yefkan ismawen
Cwiṭ i d-nessuder yekna
Tiẓgi εemren-tt yiddawen
Neẓẓel tudert-nneɣ ɣef ẓẓebra
Nnig yifḍiṣen n yiderwicen
Limer at nniya
D kra ɣef qqlent tekmamin
S yiwen ɣer miyya
Lḥif d ddel ad ten-ggamin
Ad terfed s lğehd leḥya
Tabɣest ad teffeɣ seg ugelmim
Agdud ad myefken ifassen
Talwit ad tt-sbedden d lsas
Tugdi ɣef taẓayt-is ad εefsen
Iderwicen, ad asen-kksen ṛṛṣaṣ
Ifrax ɣef ttjur ad rsen
Ɣef wulawen igenni d afessas
Ad trid tefsut yumsen
Di ṛṛeḥba ur ttilint tmenqas
Yiwen n wass widen yeggugmen
Ad kksen takmamt i yimi
Si teεwint n wul ad agmen
Ayen i iḍerref urwiḥ d tirni
Yiwen n wass widen yeggugmen
Ad rren takmamt i lmedfeε
Si teεwint n wul ad agmen
Kulci di ddunit d nnfeε
Ass-nni ad nidir di tlelli
Deg yigran n ddunit yurwen
Yal ass ad yuɣel d izli
Tilawin ad ssemɣint afriwen
Deg ugama ad ğğuğgent s tayri
S tuzuft ad snefcucin wallaɣen
Anda ulac ṭṭraḍ d yimenɣi
Taḍṣa ad tt-nettağǧew s wurawen